Latest Post

सकाळच्या नाश्त्याला घावनं करताना लक्षात आले, की कोकणातले सगळे पदार्थ कमी साहित्य लागणारे आहेत.

कमी पिठात बरेच लोक खातील असेच पदार्थ आहेत बहुतेक. उदा. घावनं. यात कपभर पिठात तांब्याभर पाणी टाकलं की पंधरा वीस घावनं निघतात. कुळथाची पिठी-भात करायची तर एका मोठ्या चमचाभर पिठात असंच तांब्याभर पाणी ओतलं की सारं घर खाऊ शकतं.

कोकणी माणसाचे एकेकाळी मुख्य अन्न असलेल्या भाताच्या पेजेचीही तीच कथा. चार दाणे तांदुळाची गाडगाभर पेज. ती पिऊन कोकणी माणूस दुपारच्या मासळी-भातापर्यंत राबू शकतो.

केळीच्या पानातली पानगी घ्या कपभर पीठ नरम भिजवलं की पाच सात पातळ पानगी निघतात. सोलकढी घ्या एक नारळ अंगणातलाच वाटून त्यात पाणी आणि आगळ वाढवत जायचं शेवटचा माणूस जेवेपर्यंत.

कोकणी माणसाच्या काटकसरीचं , नेमकेपणाचं आणि नेटकेपणाचंही कारण असावं बहुधा.

*अभावातून कसं पुरवायचं तेच यातून कळतं. म्हणूनच बहुधा कोकणी माणूस खायला प्यायला नाही म्हणून आत्महत्या करत नसावा.*

तो अंगणातल्या एका फणसावर, एका आंब्यावर जगू शकतो. सकाळी नाश्त्यात, दुपारी जेवणात गरे खाऊन राहू शकतो. माशाच्या एका तुकड्याबरोबर नुसता भात खाऊन राहू शकतो.

शाकाहारी माणूस ताकभात खाऊन राहू शकतो.
अंगणातली केळफूलं, कच्चे फणस, फणसाच्या वर्षभर भरून ठेवलेल्या आठळ्या, दारातले भोपळे,अर्धी वाटी कडधान्ये भिजवून त्याच्या पातळ उसळी ह्या भाज्या त्याला तगवतात.

थोडक्यात कोकणी माणसाला भाकऱ्यांची चवड लागत नाही. विकतच्या भाज्या लागत नाहीत. तरी तो काटक असतो. आणि जगण्याला चिवट असतो.

आणि सगळेच सारखे असल्याने कोणी कोणाला हिणवण्याचा प्रश्न येत नाही. खोटा बडेजाव मिरवण्याचा प्रश्न येत नाही.

एक अनामिक कोकणी माणूस

(नोट : पोस्ट माझी नाही परंतू कोकणी माणसाच्या
 जीवनशैली अनेक पैलू आपल्यापुढे आणायचे होते म्हणून हा सोशल मिडिया साभार. .....)


   मुंबई ( प्रतिनिधी ) –  पालिका क्षेत्राच्या स्वच्छतेसाठी दिवस रात्र कार्यरत असणा-या पालिकेद्वारे सुप्रसिद्ध वर्सेावा चौपाटीची देखील साफसफाई दिवस रात्र पद्धतीने दररोज केली जाते. या अनुषंगाने वर्सेावा चौपाटीच्या साफसफाईसाठी संस्था निवडीकरीता राबविण्यात आलेली निविदा प्रक्रिया पूर्ण झाल्यानंतर याबाबतचा कार्यादेश नुकताच देण्यात आला आहे. त्यानुसार निवड झालेल्या संस्थेद्वारे वर्सेावा चौपाटीच्या साफसफाईचे काम सुरु झाले आहे. सदर संस्थेद्वारे या कामासाठी १ अत्याधुनिक 'बीच क्लिनींग मशीन' लवकरच आयात करण्यात येणार असून सध्या १२० कामगारांद्वारे वर्सेावा चौपाटीची साफसफाई करण्यात येत आहे. या निविदा प्रक्रियेचे वैशिष्ट्य म्हणजे या निविदा प्रक्रियेत पावसाळ्याच्या साफसफाईच्या दृष्टीने पावसाळ्याचे ४ महिने व उर्वरित ८ महिने यांचा स्वतंत्रपणे विचार करण्यात आला आहे, अशी माहिती उपायुक्त (घनकचरा व्यवस्थापन)  विश्वास शंकरवार यांनी दिली आहे.
पालिका क्षेत्रातील सागरी किना-यालगत असणा-या व पर्यटकांचे आकर्षण असलेल्या चौपाट्यांची साफसफाई पालिकेद्वारेच दैनंदिन स्वरुपात नियमितपणे केली जाते. या अंतर्गत भरतीच्या दरम्यान समुद्राच्या लाटांबरोबर वाहून येणा-या कच-याची आणि चौपाटीवर उद्भवणा-या इतर कच-याची साफसफाई केली जाते. यानुसार वर्सेावा चौपाटीच्या साफसफाईसाठी निविदा प्रक्रियेअंती निवड झालेल्या संस्थेद्वारे साफसफाईची कार्यवाही नुकतीच सुरु झाली आहे. वर्सेावा चौपाटीची एकत्रित लांबी ही सुमारे ४.५ किलोमीटर असून रुंदी ही सुमारे ३५ ते ६० मीटर या दरम्यान आहे. वर्सेावा चौपाटीचे एकूण क्षेत्रफळ सुमारे २ लाख ३२ हजार ५०० चौरस मीटर एवढे आहे.पालिकेच्या 'के पश्चिम' विभागांतर्गत येणा-या वर्सेावा चौपाटीवर पावसाळ्याच्या काळात दररोज सरासरी १३० मेट्रीक टन एवढ्या कच-याची सफाई केली जाते. तर पावसाळ्या व्यतिरिक्तच्या ८ महिन्यात ही सरासरी दररोज सुमारे ४५ मेट्रीक टन एवढी असते. हे लक्षात घेऊन या वेळेच्या निविदा प्रक्रियेत पावसाळ्या दरम्यानची साफसफाई व पावसाळ्या व्यतिरिक्त इतर कालावधीत करण्यात येणारी साफसफाई याचा स्वतंत्रपणे विचार करण्यात आला आहे. यानुसार पावसाळ्याच्या काळात वर्सेावा चौपाटीवर दररोज किमान १०० कामगारांनी साफसफाई करणे अपेक्षित आहे. तर उर्वरित ८ महिन्यांच्या कालावधीत दररोज ५० कामगारांनी काम करणे आवश्यक आहे. तसेच 'बीच क्लिनींग मशीन'द्वारे साफसफाई करण्याची प्रक्रिया तांत्रिक कारणांमुळे झाली नसल्यास सदर दिवशी अतिरिक्त २० कामगार नेमणे आवश्यक असणार आहे. निविदा प्रक्रियेअंती निवड झालेल्या संस्थेने पुढील ६ वर्षे वर्सेावा चौपाटीची साफसफाई ही दैनंदिन स्वरुपात नियमितपणे करणे अपेक्षित असून यासाठी पालिकेला रुपये २२.२४ कोटी एवढा खर्च अंदाजित आहे.
निविदा प्रक्रियेअंती 'स्पेक्ट्रम इंजिनिअर्स प्रा. लि.' या संस्थेची निवड झाली असून त्यांना कार्यादेश देण्यात आला आहे. कार्यादेश दिल्यानंतर सदर संस्थेने वर्सेावा चौपाटीच्या साफसफाईचे काम लगेचच सुरु केले आहे. तथापि, यासाठी आवश्यक असणारी अत्याधुनिक यंत्रसामुग्री आयात करुन कार्यान्वित करुन घेण्यासाठी आणि निविदेतील अटी व शर्तींनुसार पूणर्ण क्षमतेने काम सुरु करण्यासाठी पालिकेच्या नियम व पद्धतींनुसार सदर संस्थेला ४ महिन्यांचा कालावधी देण्यात आला आहे. अत्याधुनिक 'बीच क्लींनीग मशीन' व्यतिरिक्त २ कॉम्पॅक्टर, २ ट्रॅक्टर इत्यादींसह आवश्यक ते साहित्य व मनुष्यबळ उपलब्ध करुन घेणेही आवश्यक आहे, अशीही माहिती शंकरवार यांनी दिली आहे.


टी शर्ट, ट्रॅक पॅन्टसह कापडी बुटांचाही क्रीडा गणवेशात समावेश
क्रीडा गणवेशातील ४ रंगांच्या 'टी शर्ट' मुळे शाळा मैदानांवर नवे क्रीडा चैतन्य

   मुंबई बुधवार ( प्रतिनिधी ) – पालिकेच्या अकराशे पेक्षा अधिक शाळांमधून सुमारे साडे तीन लाख विद्यार्थी ज्ञानाचे धडे गिरवित आहेत. पुस्तकीय अभ्यासक्रमासोबतच मनपा शाळांमध्ये विविध क्रीडा प्रकारांचेही प्रशिक्षण दिले जाते. यातून विद्यार्थ्यांच्या शारीरिक व मानसिक विकासासोबतच निर्णय क्षमता आणि एकंदरीत व्यक्तिमत्व विकास साधण्यास देखील मदत होते. मनपा शाळेतील क्रीडा सराव अधिक प्रभावी व्हावा, विद्यार्थ्यांमध्ये स्वत:च्या पलीकडे जाण्याची वृत्ती निर्माण व्हावी, संघभावना  वाढीस लागण्यासह 'क्रीडा चैतन्य' विकसित व्हावे; यादृष्टीने मनपा शाळांमधील विद्यार्थ्यांना या वर्षापासून क्रीडा गणवेश देण्यास सुरुवात करण्यात आली आहे. लाल, निळा, हिरवा किंवा पिवळा अशा चार रंगांपैकी एका रंगाच्या 'टी शर्ट' चा समावेश असलेल्या या गणवेशांमुळे आता मनपा शाळांच्या मैदानांवर नव्या उत्साहासह अभिनव 'क्रीडा चैतन्य' दिसून येत आहे; अशी माहिती अतिरिक्त पालिका आयुक्त (शहर) आबासाहेब ज-हाड यांनी दिली आहे.
पालिकेच्या शाळांमध्ये चांगल्या दर्जाचे क्रीडा प्रशिक्षण दिले जाते. मनपा शाळेतील अनेक विद्यार्थ्यांनी विविध क्रीडा प्रकारांमध्ये शालेयस्तर, विभागस्तर, राज्यस्तर; यासह राष्ट्रीय स्तरावर देखील आपल्या क्रीडा नैपुण्याचा ठसा उमटवला आहे. एवढेच नाही तर पालिका शाळांतून क्रीडा कामगिरीस सुरुवात करणा-या विद्यार्थ्यांनी ऑलिम्पीक सारख्या आंतरराष्ट्रीय क्रीडा स्पर्धांपर्यंतही मजल मारली आहे. मनपा शाळांतील ज्या विद्यार्थ्यांची एखाद्या विशिष्ट क्रीडा प्रकारात अधिक गती असेल, त्या विद्यार्थ्यांना त्या-त्या क्रीडा प्रकारास आवश्यक असणारा 'क्रीडावेश' व 'क्रीडा-साहित्य' सन १९९१ पासून देण्यात येत आहेत. हा 'क्रीडा वेश' हा प्राधान्याने प्रत्यक्ष स्पर्धांच्या वेळी किंवा विशेष सराव करतेवेळी वापरण्यात येतो. उदाहरणार्थ, हॉकी, ज्युदो, तायक्वांदो, इत्यादी क्रीडा प्रकारांसाठी आवश्यक असणारा वैशिष्ट्यपूर्ण 'क्रीडा-वेश' व 'क्रीडा साहित्य' मात्र, एखाद्या ठराविक क्रीडा प्रकारात गती असणा-या विद्यार्थ्यांच्या व्यतिरिक्त इतर विद्यार्थ्यांना शाळेच्या मैदानावर खेळताना किंवा खेळांचा सराव करताना; वेगळा असा 'क्रीडा गणवेश' आतापर्यंत नव्हता. हे लक्षात घेऊन पालिका शाळांमधील सर्व विद्यार्थ्यांना 'क्रीडा गणवेश' देण्यास या वर्षी पासून सुरुवात करण्यात आली आहे शैक्षणिक क्षेत्रात क्रीडा गणवेश ठरविताना ते विद्यार्थ्यांचे काही गट तयार करुन व प्रत्येक गटाचा एक रंग निश्चित करुन देण्याची पद्धत आहे. या गटांना रंगांच्या नावासह 'हाऊस' असे म्हटले जाते. उदाहरणार्थ; रेड हाऊस, ब्ल्यु हाऊस, ग्रीन हाऊस किंवा यलो हाऊस. या रंग आधारित 'हाऊस' निहाय विभागणीमुळे विविध खेळ खेळताना संघ भावना तयार होण्यास मदत होते. यानुसार मनपा शाळांमधील विद्यार्थ्यांचेही चार गट तयार करुन त्यांना चार रंगांचे क्रीडा गणवेश देण्यात आले आहेत. या अंतर्गत प्रत्येक वर्गातील विद्यार्थ्यांच्यी चार गटांमध्ये विभागणी करुन, त्या प्रत्येक गटातील विद्यार्थ्यास लाल, निळा, हिरवा किंवा पिवळा अशा चार रंगांपैकी एका रंगाच्या 'टी शर्ट' सह क्रीडा गणवेश देण्यात आला आहे.
मनपा शाळांमधून शिकणा-या सुमारे साडे तीन लाख विद्यार्थ्यांना देण्यात आलेल्या क्रीडा गणवेशात टी शर्ट, ट्रॅक पॅन्ट व कापडी बूट  यांचा समावेष आहे. या गणवेशातील 'टी शर्ट' व 'ट्रॅक पॅन्ट' ही टिकाऊ कापडापासून तयार करण्यात आली आहे मनपा शाळांमध्ये विविध क्रीडा प्रकारांचा सराव करण्यासाठी सोमवार ते शुक्रवार या दरम्यान आवश्यकतेनुसार व विद्यार्थ्यांच्या वयोगटानुसार एक किंवा अधिक तासिका राखून ठेवण्यात येतात. या व्यतिरिक्त दर शनिवारी विविध क्रीडा प्रकाराचा विशेष सराव देखील घेतला जातो. क्रीडा प्रकारांचा 'नियमित सराव' आणि आठवड्यातून एक दिवस घेतला जाणारा 'विशेष सराव'; या दरम्यान मनपा शाळांमधील क्रीडा शिक्षक आपल्या विद्यार्थ्यांना क्रीडा प्रकारांच्या वैशिष्ट्यांची प्रात्यक्षिकांसह माहिती देऊन त्यांच्याकडून खेळांचा सराव करवून घेतात. यापैकी दर शनिवारी घेतल्या जाणा-या विशेष सरावादरम्यान या वर्षापासून देण्यात आलेला क्रीडा गणवेश असणे अनिवार्य करण्यात आले आहे, अशीही माहिती ज-हाड यांनी दिली आहे.


खोपोली:
रंगीबेरंगी फुलांची आकर्षक सजावट, सुगंधी - धुप अगरबत्यांचा दरवळ, मंगलमयी वाद्यांची सुरावट आणि लक्ष वेधून घेणारी आरास अशा प्रसन्नशील चैतन्यदायी वातावरणात आज घरोघरी लाडक्या गणरायाचे आगमन झाल्याने सर्वत्र ठिकाणी आनंदाचे वातावरण दरवळ आहे. तर प्राणप्रतिष्ठापनेसाठी दुपारी दीडपर्यंत उत्तम मुहूर्त असल्याचे तज्ञानकडून सांगण्यात आल्याने दीडपर्यत सर्वांनी आपल्या बाप्पाची भक्तीभावाने प्राणप्रतिष्ठा केली.

महागाई, इंधन दरवाढ हे सारं विसरून प्रत्येकाला बाप्पांच्या प्राणप्रतिष्ठेचे वेध लागले होते. गणपती बाप्पा मोरयाच्या गजरात अनेक गणेशभक्तांनी बुधवारी बाप्पांना आपल्या घरी आणले, तर काही गणेशभक्तआज गुरुवारी बाप्पांचे घरी स्वागत केले.

शहरातील प्रमुख मंडळाची तयारीही पूर्ण झालीय.खोपोलीसह राज्यभरात आता दहा दिवस फक्त आणि फक्त गणरायाचे दिवस असणार आहेत.

गणरायाच्या मकाराची सजावटीतून अनेकांनी समाजाला वेगवेगळे संदेश दिले असून खालापूर तालुक्यातील ग्रामीण भागातील केळवली गावामधील एका भक्ताने पाणी आडवा पाणी जिरवा, वाहन चालवताना हेल्मेट वापरा तसेच गतीवर नियंत्रण ठेवा, स्त्री
ला समाजात अभिमानस्पद वागणूक द्या, झाडे लावाझाडे जगवा, स्त्री भूण हत्या टाळा असे संदेश देवून समाजापुढे आर्दश निर्माण केला आहे.


साक्षी तावडे.


संगीतकार आपली ओळख आपल्या गाण्यातून प्रत्येकाच्या हदयात रुजवत राहतो आणि ते रुजवलेलं बियाणचं माणसाला फुलवतं , तरुण ठेवतं त्या काळाशी बाधून ठेवतं असेच लतामंगेशकर पुरस्कार सम्मानित महान संगीतकार "स्नेहल भाटकर"  म्हणजेच " वासूदेव गंगाराम भाटकर" यांचे हे जनशताब्दी वर्ष आहे


मुंबई सोमवार ( प्रतिनिधी ) – देशाची आर्थिक राजधानी असलेल्या मुंबईत कोणत्या ना कोणत्या कारणाने आगी लागत आहे आतातर मुंबईत दोन दिवसांनंतर सवाॅचा लाडका गणपती बाप्पाचा उत्सव आहे या उत्सवात कोणतेही गालबोट लागू नये यासाठी आता सेवाभावी संस्था पुढे आल्या आहेत मुंबईत लागणाऱ्या आग दुर्घटनेच्या पार्श्वभूमीवर मंडपांच्या सुरक्षितेसाठी सेवाभावी संस्था आपत्कालिन परिस्थितींवर तात्काळ उपाययोजना करण्याचे धडे मंडळातील कार्यकर्त्यांना देणार आहेत
  गणपती बाप्पाचा सन जवळ आला की गणेश भक्त या उत्सवासाठी कामाला लागतात या  गणेश उत्सवाला व्यापक स्वरूप  आले आहे. गणरायाच्या दर्शनासाठी आलेल्या भाविकांच्या सुरक्षिततेचा प्रश्नसुद्धा मोठा गंभीर होत चालला आहे. मुंबईतील काही प्रसिद्ध गणेश मंडळांच्या मंडपात एकावेळी दोन ते तीन हजार भाविक उपस्थित असतात, अशा वेळी आगीची घटना घडल्यास मोठा अनर्थ होऊ शकतो. गणेशोत्सावात होणाऱ्या ट्राफिक जॅम मुळे अग्नीशमन यंत्रणा पोहचेपर्यंत अनेक निरपराध नागरिकांचा जीवही  जाऊ शकतो. याच परिस्थितीचे गांभीर्य ओळखून गेली सात वर्षे  “फायर अँड  सिक्युरिटी असोसिएशन ऑफ इंडिया” ही  सेवाभावी संस्था फायर अँड सेक्युरिटी ऑडिटच्या  माध्यमातून गणेश मंडळांना सहकार्य करीत आहे. विनामोबदला घेता मंडपात येणाऱ्या नागरिकांच्या सुरक्षिततेसाठी गणेश मंडळांना योग्य ते मार्गदर्शन करीत आहेत. योग्य स्पॉटला सीसीटीव्ही कॅमेरा लावणे, रोषणाई करताना केलेली वायरींगची तपासणी, आग विझवण्याच्या साधनांची तपासणी, आपत्कालीन वेळी बाहेर निघण्याची व्यवस्था, मेटल डिटेक्टर सुरक्षा यंत्रणा, आपत्कालीन परिस्थितीत उपाय करण्यासाठी मंडळातील कार्यकर्त्यांना मॉक ड्रीलचे प्रशिक्षणावर आधारित संस्थेकडून सुरक्षा ऑडिटचे मार्गदर्शन दिले जात आहे. उत्सवादरम्यान कोणतीही आपतकालीन परिस्थिती उद्भवली तर सरकारी यंत्रणांची मदत पोहचेपर्यंत बचाव कार्य कसे करायचे याबाबत कार्यकर्ते प्रशिक्षित असणे आवश्यक आहे. आमची संस्था २००२ सालापासून फायर प्रोटेक्शन, लाइफ सेफ्टी, सिक्युरिटी, बिल्डींग ऑटोमेशन, लॉस प्रिवेंशन आणि रिस्क मॅनेजमेंट या क्षेत्रात सरकारी संस्थांसोबत काम करीत आहे. मुंबईत दोन हजारहुन अधिक गणेश मंडळे आहेत. दरवर्षी गणेशमूर्ती पाहण्यासाठी पर्यटक व भाविकांची गर्दी वाढतच आहे. आमच्या संस्थेची  मुंबईतील सामाजिक उपक्रमाचे हे आठवे वर्ष आहे. गेल्यावर्षी २५० मंडळांनी यात सहभाग घेतला होता. यंदा ३०० गणेश मंडळांचे सुरक्षा ऑडिट करावयाचा मानस आहे, अशी माहिती फायर अँड सिक्युरिटी असोसिएशन ऑफ इंडिया मुंबई चॅप्टरचे अध्यक्ष अश्विन ईजंतकर यांनी दिली. तसेच अनेक गणेश मंडळाकडून आम्हाला सकारात्मक प्रतिसाद मिळत असल्याचे त्यांनी सांगितले. शहराच्या सुरक्षिततेसाठी आम्ही हा महत्वपूर्ण उपक्रम राबवीत आहोत. गणेश मंडळाकडून कोणतेही शुल्क आकारले जात नाही. गणेश मंडळातील कार्यकर्ते हे भाविकांच्या सुरक्षिततेसाठी दिवसरात्र मेहनत घेत असतात. म्हणूनच उत्तम प्रकारे सुरक्षितता देणाऱ्या मुंबईतील  गणेश मंडळाना आमची संस्था रोख रक्कम व पुरस्कार देऊन त्यांचे सामाजिक मनोबल वाढविण्याचा प्रयत्न करीत आहे, असे संस्थेचे मार्केटींग व ब्रॅडिंगचे प्रमुख आर्किटेक्ट श्रेयश आत्माराम सरमळकर यांनी सांगितले आहे

mumbaivarta

{google-plus#https://plus.google.com/u/0/}

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget