Latest Post

रिपब्लिकन पक्षाचे विविध गट आणि दलित पँथर यांनी एकत्र येऊन आज रिपब्लिकन फ्रंटची स्थापन केली 
प्रतिक्रिया:दीपक दादा जगताप


(विशेष प्रतिनिधी )-
आगामी लोकसभा तसेच विधानसभेच्या सार्वत्रिक निवडणुकीच्या पार्श्वभूमीवर महाराष्ट्रात विविध आघाड्या उभ्या राहत असून रिपब्लिकन पक्षाचे विविध गट आणि दलित पँथर यांनी एकत्र येऊन आज रिपब्लिकन फ्रंटची स्थापन केली . संविधान तसेच ऍट्रॉसिटी रक्षणासाठी या फ्रंट मध्ये सर्व समविचारी पक्षांनी सहभागी व्हावे असे आवाहन या फ्रंटचे एक  निमंत्रक दिलीपदादा जगताप यांनी केले आहे

सन  २०१९ मध्ये महाराष्ट्रासह देशभरात लोकसभा व विधानसभा निवडणूक होत आहेत देशपातळीवर काँग्रेसने भाजपविरोधात महाआघाडी स्थापन करण्याची तयारी सुरु केली असतानाच महाराष्ट्रातदेखील सर्व समविचारी पक्षांना सोबत ठेवण्याची काँग्रेस-राष्ट्रवादीची तयारी आहे . दरम्यान महाराष्रात काँग्रेसने भारिप बहुजन महासंघाला सोबत येण्याचे आवाहन केली असले तरी भारिप नेते प्रकाश आंबेडकर यांनी वंचित बहुजन आघाडीची स्थापना करीत या आघाडीत एमआयएम घेतले आहे .आंबेडकरांच्या या प्रयोगात रिपब्लिकन पक्षाचा एकही गट सहभागी करण्यात आलेला नाही . असा काँग्रेस आणि वंचित आघाडीत नसलेल्या रिपब्लिकन तसेच दलित पँथरच्या विविध गटांची आज मुंबई मराठी पत्रकार संघ येथे बैठक झाली . भाजपला सत्तेपासून रोखण्यासह रिपब्लिकन  पक्षाचे अस्तित्व या निवडणुकीत दाखविण्यासाठी रिपब्लिकन फ्रंटची घोषणा यावेळी करण्यात आली .

भारतीय संविधानाचे रक्षण तसेच ऍट्रॉसिटी कायद्याची प्रखर अंमलबजावणी करण्यासाठी हा फ्रंट आगामी काळात काम करणार असून आगामी निवडणुकीत रिपब्लिकन चळवळीचे अस्तित्व दाखविण्यासाठी सर्व समविचारी पक्ष संघटनांना एकत्र आणणार असल्याची माहिती जगताप यांनी दिली . आज झालेल्या या फ्रंटच्या बैठकीत राजाराम खरात , सुखदेव सोनावणे,हरिदास टेम्भूर्णे ,यशपाल सरवदे,दिनेश गोडघाटे ,अमृत गजभिये, सोमनाथ सोनावणे सखाराम फाले , विजय पाटसूपे,यशवंत तेलंग,अशोक भिवगडे,सुनील हालंकार,मिलिंद जाधव श्रीरंग जाधव,संजय भालेराव, आदी प्रमुख नेते या बैठकीत उपस्थित होते .




IL & FS वित्तीय संस्थेमध्ये सर्व सामन्य निवेशाकांचे पैसे गुंतवून IL & FS ला वाचविण्याचा प्रयत्न भाजपा सरकारने करू नये – संजय निरुपम...

मुंबई प्रतिनिधी:
मुंबई स्थित IL & FS वित्तीय संस्था गेली ३० वर्षे जुनी पायाभूत, वीज, रस्ते प्रकल्पांसाठी अर्थ सहाय्य करणारी संस्था आहे. त्यांच्या वेगवेगळ्या २२५ सब्सिडरिज आहेत. IL & FS  वर ३५०० करोडचे कर्ज ताबडतोब भरणे आहे आणि त्यांच्याकडे फक्त २०० करोड उपलब्ध आहेत. तसेच त्यांच्या सर्व संचालकांनी दोन आठवड्यांपूर्वीच राजीनामे दिलेले आहेत. IL & FS हि वित्तीय संस्था संपूर्णतः कोसळलेली आहे. या संस्थेला ९०,००० कोटींचा तोटा झालेला आहे. भाजपा सरकारतर्फे IL & FS ला वाचविण्याचा प्रयत्न सुरु केलेला आहे. भाजपा सरकारने IL & FS ला वाचविण्यासाठी LIC, SBI, Cenral Bank यांच्यावर गुंतवणुकीसाठी दबाव टाकू नये. IL & FS वित्तीय संस्थेमध्ये सर्व सामन्य निवेशाकांचे पैसे गुंतवून IL & FS ला वाचविण्याचा प्रयत्न भाजपा सरकारने करू नये, याला आमचा विरोध आहे, अशी माहिती मुंबई कॉंग्रेसचे अध्यक्ष संजय निरुपम यांनी पत्रकार परिषदेत दिली. या पत्रकार परिषदेला माजी आमदार चरण सिंग सप्रा आणि माजी नगरसेवक जॉर्ज अब्राहीम उपस्थित होते.

संजय निरुपम पुढे म्हणाले की IL & FS दिवाळखोरीत निघालेली आहे. त्यांनी त्यांचे मुंबईतील बिकेसीतील मुख्य कार्यालय १३०० कोटीला विकायला काढलेले आहे आणि त्यांचे २५ प्रकल्प आणि काही मालमत्ता हि विकायला काढलेले आहेत त्यांची किंमत सुमारे ३०,००० करोड आहे पण ते विकायला त्यांना एक वर्ष जाणार आहे. हि किंमत त्यांच्या तोट्याच्या फक्त एक तृतीयांश भरपाई होणार आहे. IL & FS मध्ये LIC चे २५.३४% समभाग आहेत, जपानची कंपनी ओरिक्स कोर्पोरेशनचे २३.५४% समभाग आहेत, अबुधाबी कंपनीची १२.५६% गुंतवणूक आहे, एचडीएफसीची ९.०२%, सेन्ट्रल बँक ऑफ इंडियाची ७.६७% आणि एसबीआय ची ६.४२% गुंतवणूक आहे. IL & FS हि वित्तीय संस्था गेल्या तीन वर्षात कोसळलेली आहे. गेल्या तीन वर्षात या कंपनीचे कर्ज ४४ % वाढलेले आहे आणि नफा ९००% ने घटलेला आहे. भाजपा सरकार याची काळजी घेऊ शकली नाही. लक्ष ठेवू शकली नाही, IL & FS मुळे गेली आठवडाभर शेअर मार्केट कोसळलेले आहे. शेअर मार्केटला ८ लाख कोटींचा तोटा झालेला आहे त्यामुळे भारताची अर्थव्यवस्था कोलमडलेली आहे. दोन आठवड्यापूर्वी IL & FS च्या ४ ते ५ संचालकांनी राजीनामा दिला, त्यांना अटक करून त्यांची सखोल चौकशी केली गेली पाहिजे, त्यांचे पासपोर्ट जप्त केले पाहिजे. नाही तर ते देखील मेहुल चोल्सी आणि निरव मोदी सारखे देशाबाहेर पळून जातील, पण हे सरकार काहीच पावले उचलत नाही आहे. IL & FS मध्ये खूप मोठा घोटाळा झालेला आहे. त्याची उच्चस्तरीय चौकशी झाली पाहिजे, अशी आमची मागणी आहे, असे संजय निरुपम म्हणाले.   

संजय निरुपम पुढे म्हणाले की लवकरच भाजपा सरकारतर्फे IL & FS ला वाचविण्यासाठी LIC, SBI, Cenral Bank यांच्या सोबतबैठक घेऊन त्यांना समभाग विकत घेण्यासाठी दबाव टाकण्यात येणार आहे. LIC मध्ये सर्व सामन्यांचा पैसा आहे म्हणून आमचा या प्रक्रियेला विरोध आहे. भाजप सरकारने LIC, SBI, Cenral Bank यांच्यावर गुंतवणुकीसाठी सक्ती करू नये. नाहीतर भविष्यात सर्व सामान्य निवेशकांना खूप मोठी अडचण निर्माण होणार आहे. भाजपच्या नितीन गडकरी यांनी IL & FS या वित्तीय संस्थेचे शोषण केले, नितीन गडकरी यांनी रस्ते प्रकल्पासाठी आणि पियुष गोयल यांनी विजेच्या प्रकल्पांसाठी IL & FS चे पैसे गुंतवलेले आहेत. रिझर्व बँक ऑफ इंडियाने तीन वर्षापूर्वीच भाजपा सरकारला सूचित केले होते की IL & FS मध्ये खूप गडबड आहे. भाजपा सरकारने आणि अर्थ खात्याने रिझर्व बँक ऑफ इंडियाच्या रिपोर्टवर लक्ष दिले नाही. दुर्लक्षच केले. हि नरेंद्र मोदी सरकार आणि अर्थ खात्याची खूप मोठी चूक झालेली आहे. भाजपा सरकार हि परिस्थिती सांभाळायला असमर्थ ठरलेली आहे. IL & FS मुळे इंडिया बुल्स, बजाज फायनान्स, एडेलवाइज कॅपिटल, दिवान फायनान्स या कंपनींचे हि मोठे नुकसान झालेले आहे. या कंपन्या सुद्धा कधी हि बंद पडतील. हि संपूर्ण परिस्थिती भाजपा सरकार सांभाळू शकलेली नाही. भाजपा सरकारमुळे भारताची अर्थव्यवस्था कोलमडलेली आहे, रुपयाचे मूल्य घसरलेले आहे, GDP Growth खाली गेलेला आहे. हे सरकार फेल ठरलेले आहे. या सगळ्यांचा परिणाम सर्व सामन्यांच्या भविष्यातील बचीतीवर होणार आहे. प्रोविडेंट फंड, पेन्शन, म्यूच्युअल फंड यांच्यावर हि खूप मोठा गंभीर परिणाम होणार आहे. मी सरकारला सावधान करत आहे की IL & FS च्या सर्व भ्रष्ट संचालकांना वाचवू नका, त्यांना अटक करा आणि त्यांची सखोल चौकशी करा, या संपूर्ण प्रकरणाची उच्चस्तरीय चौकशी करा. हा एक खूप मोठा घोटाळा आहे, अशी माहिती संजय निरुपम यांनी दिली.



   मुंबई  ( प्रतिनिधी ) –  जागतिक ह्रदयदिनाच्‍या निमित्ताने ‘ कार्डिओलॉजी सोसायटी ऑफ इंडिया’ (सीएसआय) आणि बृहन्‍मुंबई महानगरपालिका यांच्‍या पुढाकाराने ह्रदयविकाराच्‍या झटक्‍याला कसे सामोरे जावे याबाबत जनजागृती करण्‍यासाठी जनजागृती मोहिम उद्या शनिवार रोजी सकाळी ११.३० वाजता वरळी येथील नॅशनल स्‍पोर्टस क्‍लब ऑफ इंडिया येथे आयोजि‍त करण्‍यात आली आहे.
याप्रसंगी प्रमुख अतिथी म्‍हणून सुप्रसिध्‍द सिने अभिनेत्री श्रीम. काजोल,  महापालिका आयुक्‍त अजोय मेहता,  मुंबई पोलिस आयुक्‍त सुबोध जयस्‍वाल यांची विशेष उपस्थिती असणार आहे.
अचानकपणे आलेल्‍या ह्रदयविकाराच्‍या झटक्‍याला कसे सामोरे जावे  आणि तातडीने कोणते प्राथ‍मिक उपचार घावेत, याबाबत या मोहिमेत मार्गदर्शन करण्‍यात येणार आहे. कोणतेही पूर्वसूचना न देता अचानकपणे एखाद्या व्‍यक्तिला ह्रदयविकाराच्‍या झटका आल्‍यानंतर जवळ उपस्थित असलेल्‍या व्‍यक्ति  भांबावून जातात. वेळेत उपचार न मिळाल्‍याने  अनेकदा रुग्‍ण दगावण्‍याचाही घटना घडल्‍या आहेत. तेव्‍हा अश्‍या आपत्‍कालीन परिस्थितीमध्‍ये कोणते प्रथमोपचार करावेत याबाबत मार्गदर्शन या कार्यक्रमामध्‍ये केले जाणार आहे. या जनजागृती मोहिमेमध्‍ये पालिकेतंर्गत राबविण्‍यात येणाऱया कार्यक्रमांची माहिती पालिका आयुक्‍त अजोय मेहता, तर पोलिस प्रशासन ही मोहिम कशी राबविणार याची माहिती पोलिस आयुक्‍त सुबोध जयस्‍वाल प्रसार माध्‍यमांसमोर मांडणार आहेत.

पालिका सभागृहाच्या कामकाजात सहभागी न होणा-या नगरसेवकावर आता लवकरच सीसीटीव्ही यंत्रणेध्दारे नजर
बायोमॅट्रीक हजेरी नगरसेवकांनाही बंधनकारक
सभागृहात लागणार सीसीटीव्ही
मुंबई ( प्रतिनिधी ) – देशात सर्वात मोठी पालिका म्हणून गणल्या जाणाऱ्या मुंबई पालिकेतील नगरसेवकावर आता लवकरच सीसीटीव्ही कॅमेर्‍याची नजर असणार आहे पालिका सभागृहाच्या हजेरी पुस्तीकेवर सही करून सभागृहाच्या कामकाजात सहभागी न होता चक्क सभागृहाबाहेरून पळ काढणाऱ्या नगरसेवकांसाठीआता बायोमॅट्रीक हजेरी बंधनकारक करण्यात येणार आहे.तसेच पालिका सभागृहाच्या कामकाजात सहभागी न होणाऱ्या नगरसेवकांवर आता सीसीटीव्ही यंत्रणेद्वारे नजर ठेवली जाणार आहे मात्र यातून महापौर आणि उपमहापौर यांना या निर्णयातून वगळण्यात येणार आहे.त्यामुळे पळ काढणा-या नगरसेवकांना या निणॅयाची चांगलीच झळ बसणार आहे
   मुंबई ही देशाची आर्थिक राजधानी आहे या नगरीतील विकास कामावर , समर-या आणि अनेक विषयावर  पालिकेच्या सभागृहात चर्चा केली जाते. विकास कामे मंजुर केली जातात. धोरणात्मक निर्णयही घेतले जातात. अशावेळी नगरसेवकांची उपस्थिती महत्त्वाची असते. केवळ हजेरी नाही तर पुरेशी संख्याही महत्त्वाची असते. पालिका सभागृहाच्या बैठकीला उपस्थित राहणाऱ्या नगरसेवकांना सभागृहाबाहेरील नोंदवहीमध्ये सही करून प्रवेश दिला जातो. परंतु अनेक वेळा नगरसेवक येथे हजर नसतात. तर काही नगरसेवक केवळ नोंदवहीत हजेरी लावून परस्पर घरी निघून जातात. अशावेळी महत्वाच्या निर्णयावर निर्णय घेताना, राजकीय पक्षांना अडचणीस सामोरे जावे लागते. मुंबईतील समस्यांचे निराकरण करण्याची महत्वाची जबाबदारी त्यांच्यावर असते. मात्र, काही नगरसेवकांना सभागृहातील कामकाजाची माहिती नसते. परिणामी नगरसेवकांचा सभागृहाच्या कामकाजात सहभाग असावा यासाठी सभागृहाच्या दरवाजाच्यावर बायोमेट्रीक मशीन आणि सीसीटीव्ही यंत्रणा बसविण्यात यावी, अशी मागणी भाजपचे गटनेते मनोज कोटक यांनी केली होती. महापौरांनी ही मागणी मंजूर करुन पालिका आयुक्तांच्या अभिप्रायासाठी पाठवली. आयुक्त अजोय मेहता यांनी यावर सकारात्मक अभिप्राय देताना, सीसीटीव्ही यंत्रणा आणि बायोमेट्रीक मशीन लावण्याचे निर्दश प्रशासनाला दिले आहेत. यातून महापौर व उपमहापौर यांना वगळण्यात आले आहे. या निर्णयामुळे दांडीबहाद्दर नगरसेवकांना चाप बसणार आहे.


मुंबई ( प्रतिनिधी ) – देशाची आर्थिक राजधानी असलेल्या मुंबईतील पालिका निवासी डॉक्टर अनेक समस्यांनी हैराण आहेत मात्र आता लवकरच या डॉक्टरांच्या समस्या दूर होणार आहेत पालिका रुग्णालयाच्या दरमहा होणाऱ्या आढावा बैठकीत आता निवासी डॉक्‍टरांनाही सहभागी होता येणार आहे. त्यामुळे निवासी डॉक्‍टरांना थेट रुग्णालय प्रशासनासमोर आपल्या अनेक समस्या मांडता येणार आहेत.
मुंबईत सुमारे दिड कोटी जनता राहत असून या जनतेला पालिका आरोग्य सेवा देत आहे पालिका  रुग्णालयांमध्ये विविध विभागात कोणत्या समस्या आहेत, हे फक्त निवासी डॉक्‍टरांनाच माहित असते. मात्र त्यांच्या रुग्णांना भेडसावणाऱ्या समस्या त्यांना थेट प्रशासनापुढे मांडता येत नाहीत. डॉक्‍टरांना भेडसावणाऱ्या समस्यांचा आढावा घेण्यासाठी मुंबई महापालिकेच्या प्रत्येक रुग्णालयात दर महिन्याच्या अखेरीस बैठक घेतली जाते. संबंधित अधिष्ठातांच्या अध्यक्षतेखाली ही बैठक होते. या बैठकीत रुग्णालयाच्या प्रत्येक विभागाचे प्रमुख, अभियंता, परिचारिका प्रमुख, प्रशासकीय अधिकारी आणि अन्य कर्मचाऱ्यांचा समावेश असतो. मात्र निवासी डॉक्‍टरांना या बैठकीत सहभागी होता येत नव्हते. पालिकेच्या मुख्य तिन्ही रुग्णालयांचे वैद्यकीय संचालक डॉ. अविनाश सुपे यांच्यासह केईएम रुग्णालयात गेल्या मंगळवारी मार्ड प्रतिनिधींची बैठक झाली. या बैठकीत मार्डच्या डॉक्‍टरांनी आपल्या मागण्या मांडल्या. या मागण्यांवर चर्चा करण्यात आली. यात निवासी डॉक्‍टरांना त्यांचे प्रश्न मांडता यावेत, यासाठी प्रत्येक महिन्यात घेतल्या जाणाऱ्या बैठकीत त्यांना सहभागी करण्याचा निर्णय झाला, असे डॉ. अविनाश सुपे यांनी सांगितले. ज्या मागण्या पालिकेशी संबंधित आहेत, त्याबाबत चर्चा करण्यात आली. या चर्चेत डॉक्‍टरांच्या मागणीनुसार पालिका रुग्णालयांत होणाऱ्या महिन्याच्या आढावा बैठकीत त्यांना सहभागी होता येईल, असा निर्णय घेण्यात आला आहे. त्यामुळे आता मार्डना आपल्या समस्या थेट प्रशासनापुढे मांडता येणार आहेत. 




काँग्रेसच्या महामोर्चादरम्यान मल्लिकार्जुन खर्गे यांनी मागणी केली कि पंत्रधान नरेंद्र मोदी आणि संरक्षण मंत्री निर्मला सीतारामन यांनी राजीनामा द्यावा.......  
मुंबई प्रतिनिधी
मुंबई काँग्रेस आणि महाराष्ट्र प्रदेश काँग्रेस यांच्या संयुक्त विद्यमाने आज महालक्ष्मी रेसकोर्स ते ऑगस्ट क्रांती मैदान असा काँग्रेसचा महामोर्चा काढण्यात आला होता. काँग्रेसचे महाराष्ट्र प्रभारी मल्लिकार्जुन खर्गे यांच्या नेतृत्वाखाली हा मोर्चा काढण्यात आला होता. या मोर्चाला संबोधित करताना मल्लिकार्जुन खर्गे म्हणाले की, मोदी जी मोठ्या मोठ्या गोष्टी करतात पण देशात वाढणाऱ्या भ्रष्टाचाराबद्दल, राफेल विमान खरेदी व्यवहाराबद्दल, महिलांवरील अत्याचाराबद्दल, अल्पसंख्यांक आणि दलितांवर होणाऱ्या अत्याचाराबद्दल कधीही काहीच बोलत नाहीत. जे काही बोलतात ते लोकांचे मन विचलित करण्यासाठी नवीन नवीन जुमले सांगत असतात. राफेल घोटाळा हा या देशातील आज वरच्या इतिहासातील खूप मोठा घोटाळा आहे. मला पंतप्रधान नरेंद्र मोदी आणि सरंक्षण मंत्री निर्मला सीतारामन यांना विचारायचे आहे की, जर तुम्ही म्हणता की राफेल विमान खरेदी व्यवहार पारदर्शक आहे. प्रामाणिकपणाने देशाच्या हितासाठी केलेला व्यवहार आहे. मग तुम्ही या खरेदी व्यवहाराचे मूल्य का सांगत नाहीत? आम्ही त्यांना संसदेत विचारले की, या राफेल विमान खरेदी व्यवहाराची खरी किंमत जाहीर करा. कारण जेव्हा आमचे सरकार असताना जेव्हा आम्ही या विमानांची किंमत प्रत्येकी ५६० करोड रुपये  होती. पण आज भाजप सरकारने हीच विमाने प्रत्येकी १६५० करोड रुपये दराने विकत घेतली आहेत. अशी ३६ विमाने घ्यायला आपल्या देशाने ४१, २०५ करोड रुपये जास्त मोजले. ही विमाने मूळ किमतीपेक्षा तिप्पट दराने विकत घ्यायचे कारण काय? हा या देशाचा, देशातील नागरिकांचा पैसा आहे. हा खूप मोठा घोटाळा आणि भ्रष्टाचार आहे आणि या घोटाळ्यामागे पंतप्रधान नरेंद्र मोदी आहेत, त्यांचे बिंग फुटले आहे. त्यांनी अनिल अंबानींला मदत केलेली आहे. फ्रान्सचे माजी राष्ट्रपती होलांदे यांनी सांगितले की, आम्हाला या विमानांचा करार अनिल अंबानींच्या रिलायन्स डिफेन्स कंपनीला द्यायचे नव्हते. तर आम्हाला हा कॉन्ट्रॅक्ट हिंदुस्थान एरोमॅटीक लिमिटेड ला द्यायचे होते. तसे आम्ही नक्की केले होते. पण भारताचे पंतप्रधान नरेंद्र मोदींनी आमचे ऐकले नाही. त्यांनी हा कॉन्ट्रॅक्ट रिलायन्स कंपनीला द्यावा यासाठी आमच्यावर दबाव टाकला. आमच्याकडे दुसरा मार्ग नव्हता म्हणून आम्ही हा कॉन्ट्रॅक्ट अनिल अंबानींच्या रिलायन्स डिफेन्सला दिला. यावरून च हे स्पष्ट होते की, या घोटाळ्यामध्ये पंतप्रधान नरेंद्र मोदी आहेत. चौकीदार आता भागीदार झालेला आहे. ते चोरी तर हे करतातच आणि जगाला सांगत फिरतात की, मी खूप प्रामाणिक आहे, जगात सर्वात जास्त प्रामाणिक पंतप्रधान मीच आहे. पण फ्रान्सच्या माजी राष्ट्रपतींच्या विधानामुळे नरेंद्र मोदी यांचे खरे रूप जनतेसमोर आलेले आहे. आज आम्ही मागणी करत आहोत की, जर राफेल व्यवहारामध्ये खरोखरच पारदर्शकता आहे, तर या व्यवहाराची चौकशी कॅगमार्फत करावी आणि पंतप्रधान नरेंद्र मोदी यांच्याकडे मागणी करत आहे की, जर आपण खरोखरच प्रामाणिक आहात, तर आपण ताबडतोब जॉईंट पार्लिमेंटरी कमिटी (JPC) ची बैठक बोलवावी आणि या व्यवहाराबद्दल खरी माहिती जनतेला सांगावी. या कमिटीमध्ये सरकारतर्फे भाजपचे लोक  असतील. आमचे हि लोक असतील तसेच भाजपचे बहुमत आहे, मग तुम्ही कशाला घाबरता. तुम्हाला कसली भीती वाटते आहे. आमचे सरकार असताना जेव्हा जेव्हा JPC ची मागणी  करण्यात आली. तेव्हा तेच आम्ही JPC बसवली. त्या त्या विषयाचे स्पष्टीकरण दिले. आम्ही कधीही काहीही लपवले नाही. संसदेत उठलेल्या प्रत्येक प्रश्नाचे काँग्रेसने उत्तर दिले आहेत. मग तुम्ही का JPC ची बैठक का लावत नाहीत. कारण तुम्हाला भीती वाटते की, तुमचा भ्रष्ट्राचार आणि घोटाळा बाहेर पडेल. तुमची चोरी आता पकडली गेली आहे. जनता तुम्हाला चोर म्हणेल याची तुम्हाला भीती वाटत आहे. म्हणूनच तुम्ही JPC ची काही गरज नाही, असे सांगत आहेत. पंतप्रधान नरेंद्र मोदी जनतेशी खोटे बोलत आहेत की, राफेल विमाने भाजप सरकार युपीए सरकारपेक्षा स्वस्त दरात विकत घेत आहेत. पण आमचा प्रश्न आहे की जर तुम्ही स्वस्त दरात राफेल विमाने विकत घेत आहेत. मग त्याची खरी किंमत सांगायला कशाला घाबरत आहेत. यावरूनच खरे काय ते स्पष्ट होते आहे. 

काँग्रेसचे प्रदेशाध्यक्ष अशोक चव्हाण म्हणाले की, आज आम्ही राफेल विमान खरेदीच्या घोटाळ्याविरोधात महालक्ष्मी रेसकोर्स ते ऑगस्ट  क्रांती मैदान असा मोर्चा काढला आहे. याच एतिहासिक ऑगस्ट क्रांती मैदानातून महात्मा गांधी यांनी इंग्रज सरकारविरोधात चले जाव चा नारा दिला होता. अरुणा असफ अली यांनी देशाचा तिरंगा याच मैदानात फडकावला होता आणि आज आम्ही याच मैदानावरून भाजप सरकार चले जाव असा नारा देत आहोत. राफेल विमान घोटाळ्यातील पैसा या देशातील जनतेचा पैसा आहे, या देशाचा पैसा आहे. भाजप सरकार राफेल विमान खरेदी व्यवहाराबाबत विधानसभेमध्ये, लोकसभेमध्ये खोटे बोलत आहे. २०१९ मध्ये देशामध्ये निवडणूका आहेत. जर पंतप्रधान नरेंद्र मोदी खरोखरच प्रामाणिक आहेत, त्यांचे सरकार जर खरोखरच प्रामाणिक आहे. तर त्यांनी २०१९ अगोदर JPC ची बैठक बोलवावी आणि राफेल घोटाळ्यातील पैसा कुठे गेला ते जनतेला सांगावे. 

मुंबई काँग्रेसचे अध्यक्ष संजय निरुपम याप्रसंगी बोलताना म्हणाले की, आम्ही आज हजारो कार्यकर्त्यांसह महामोर्चा काढून रस्त्यावर उतरून पंतप्रधान नरेंद्र मोदी आणि सरंक्षण मंत्री निर्मला सीतारामन यांचा राजीनाम्याची मागणी करत आहोत. भाजप सरकारच्या राफेल विमान घोटाळा प्रकरणी या दोघांनी राजीनामा दिलाच पाहिजे. हा खूप मोठा भ्रष्टाचार आणि घोटाळा आहे. हा ४१२०५ करोडचा घोटाळा आहे. हा पैसा आपल्या देशाचा आहे, हा पैसा गरीब जनतेचा पैसा आहे, हा पैसा शेतकरी आणि व्यापाऱ्यांचा आहे आणि हा पैसा नरेंद्र मोदी यांनी अनिल अंबानींच्या खिशात घातला. आमचे अध्यक्ष राहुल गांधी यांनी वारंवार हि मागणी केली आहे कि हा खूप मोठा घोटाळा आहे आणि याची संयुक्त संसदीय समिती मार्फत या संपूर्ण व्यवहाराची चौकशी झाली पाहिजे. पण हे सरकार चौकशी करायला घाबरत आहे. जो पर्यंत नरेंद्र मोदी आणि निर्मला सीतारामन राजीनामा देत नाहीत तो प्रयन्त आमचे हे आंदोलन सुरूच राहणार आहे. 

काँग्रेसच्या आजच्या या मोर्चामध्ये मल्लिकार्जुन खर्गे यांच्यासोबत माजी मुख्यमंत्री आणि महाराष्ट्र प्रदेश काँग्रेसचे अध्यक्ष अशोक चव्हाण, विरोधी पक्ष नेते राधा कृष्णा विखे पाटील, माजी मुख्यमंत्री सुशीलकुमार शिंदे, मुंबई काँग्रेसचे अध्यक्ष संजय निरुपम, काँग्रेसचे सचिव आशिष दुआ, सोनल पटेल, माजी मंत्री सुरेश शेट्टी, कृपाशंकर सिंग,  बाळासाहेब थोरात, खासदार हुसेन दलवाई, माजी खासदार एकनाथ गायकवाड, आमदार शरद रणपिसे, असलंम शेख, अमीन पटेल, नसीम खान, वर्षा गायकवाड, माजी आमदार चरण सिंग सप्रा, मधू चव्हाण, बलदेव खोसा, बाबा सिद्दीकी, अशोक जाधव, अलका देसाई, जिल्ह्ध्यक्ष सुनील नरसाळे, हुकुलराज मेहता, जिया उल रहमान, अशोक सुत्राळे आणि मुंबई काँग्रेसचे सरचिटणीस भूषण पाटील आणि संदेश कोंडविलकर, महिला काँग्रेस अध्यक्ष अजंता यादव, एससी सेलचे अध्यक्ष कचरू यादव व हजारोच्या संख्येने काँग्रेसचे कार्यकर्ते आणि पदाधिकारी उपस्थित होते. 



कोस्टल रोडच्या अंतरंगत
सागरी किनारा रस्त्याचे ७८ टक्के भराव क्षेत्र नागरी सेवा सुविधांसाठी
तब्बल ७५ लाख चौरस फूटात होणार उद्याने, जॉगिंग ट्रॅक, शौचालये, खुले नाट्यगृह
एकूण १ हजार ६२५ वाहन क्षमता असणारे ३ भूमीगत वाहनतळ
   मुंबई ( प्रतिनिधी ) –  बृहन्मुंबई पालिकेसाठी प्रतिष्ठेचा असलेल्या आणि मुंबईकर नागरिकांसाठी बहु-उपयोगी ठरणा-या प्रस्तावित सागरी किनारा रस्त्यासाठी (कोस्टल रोड) उपलब्ध होणा-या भराव क्षेत्रापैकी २२ टक्के क्षेत्रात सागरी किनारा रस्त्याचे बांधकाम करण्यात येणार आहे. तर उर्वरित सुमारे ७८ टक्के क्षेत्रात म्हणजेच ७५ लाख ३४ हजार ७३० चौरस फूट परिसराचा उपयोग हा लॅडस्केपिंगसह विविध नागरी सुविधांसाठी करण्यात येणार आहे. ज्यामध्ये प्रसाधन गृह, जॉगिंग ट्रॅक, सायकल ट्रॅक, फुलपाखरु उद्यान, सागरी पदपथ, खुले नाट्यगृह, लहान मुलांसाठीची उद्याने व खेळाची मैदाने, पोलीस चौकी, बस थांबे, रस्ता ओलांडण्यासाठी भूमीगत पदपथ, जेट्टी इत्यादींचा समावेश असणार आहे. याव्यतिरिक्त १ हजार ६२५ एवढी वाहन क्षमता असलेल्या ३ भूमीगत वाहनतळांचाही यात समावेश असणार आहे. यात 'लॅण्डस्केपिंग' प्रत्यक्ष स्वरुपात आकारास येण्यापूर्वी ते अधिकाधिक सुविधापूर्ण करण्याच्या दृष्टीने नागरिकांकडून सूचना मागविण्यात येणार आहेत, अशी माहिती मुंबई सागरी किनारा रस्ता प्रकल्पाचे प्रमुख अभियंता  मोहन माचिवाल यांनी दिली आहे.
मुंबई सागरी किनारा रस्ता प्रकल्पांतर्गत 'लॅण्डस्केप' व संबंधित कामांची माहिती देताना  माचिवाल यांनी सांगितले  या प्रकल्पासाठी ९६ लाख ८७ हजार ५१० चौरस फुटांचे भराव क्षेत्र उपलब्ध होणार आहे. यापैकी सुमारे २२ टक्के क्षेत्रात म्हणजेच २१ लाख ५२ हजार ७८० चौरस फुटांमध्ये सागरी किनारा रस्त्याचे बांधकाम करण्यात येणार आहे. तर उर्वरित ७८ टक्के जागेत म्हणजेच ७५ लाख ३४ हजार ७३० चौरस फुटांमध्ये नागरी सुविधा उभारण्यात येणार आहेत श्यामलदास गांधी उड्डाणपूल (प्रिन्सेस स्ट्रीट फ्लायओव्हर) ते राजीव गांधी सागरी सेतूच्या (वरळी वांद्रे सी लिंक) वरळी बाजुच्या दरम्यान 'मुंबई सागरी किनारा रस्ता' बांधण्याची कार्यवाही आता सुरु झाली आहे. या सागरी किनारा रस्त्यासाठी उपलब्ध होणा-या एकूण भराव क्षेत्रापैकी ७८ टक्के जागेत म्हणजेच ७५ लाख ३४ हजार ७३० चौरस फुटांमध्ये उभारण्यात येणा-या विविध नागरी सुविधां उपलब्ध होणार आहेत
३ भूमीगत वाहनतळ
प्रस्तावित सागरी किनारा रस्त्यालगत असणा-या धार्मिक स्थळांना व पर्यटन स्थळांना नागरिक मोठ्या संख्येने भेट देत असतात. हे लक्षात घेऊन, या स्थळांच्या जवळच्या परिसरात ३ मोठी भूमीगत वाहनतळे उभारण्याचे प्रस्तावित करण्यात आले आहे. यापैकी एक वाहनतळ हे महालक्ष्मी मंदिर व हाजीअली दर्गा यांच्या जवळ असणार आहे. तर दुसरे वाहनतळ हे 'अमर सन्स गार्डन' जवळ असणार आहे. तर मोठ्या प्रमाणात शालेय सहली येणा-या वरळी डेअरी व वरळी सी-फेस येथे तिसरे वाहनतळ उभारण्यात येणार आहे. या तिन्ही वाहनतळांची एकूण वाहनक्षमता ही १ हजार ६२५ एवढी असणार आहे. विशेष म्हणजे हे तिन्ही वाहनतळ भूमीगत असणार असून त्यांच्या छतावरती उद्यान वा खेळाचे मैदान विकसित करण्याचेही प्रस्तावित करण्यात आले आहे.
फुलपाखरु उद्यान
सागरी किनारा रस्त्याची उभारणी करण्यासाठी विविध शासकीय संस्थांची मंजूरी आवश्यक असते. यामध्ये केंद्रीय पर्यावरण व वन मंत्रालयाची परवानगी ही एक महत्त्वाची परवानगी आहे. मुंबई सागरी किनारा रस्ता उभारण्यासाठी ही परवानगी यापूर्वीच प्राप्त झाली आहे. तथापि, ही परवानगी देताना केंद्रीय पर्यावरण व वन मंत्रालयाने 'बॉटॅनिकल बटरफ्लाय गार्डन' उभारण्याची अट घातलेली आहे. त्यानुसार उपलब्ध होणा-या भराव क्षेत्रामध्ये बृहन्मुंबई महापालिकेद्वारे एक 'फुलपाखरु उद्यान' विकसित करण्यात येणार आहे. यासाठी १० कोटी रुपयांची प्राथमिक तरतूद देखील महापालिकेद्वारे करण्यता येत आहे.
जॉगिंग ट्रॅक व सायकल ट्रॅक
आजच्या धावपळीच्या व धकाधकीच्या जीवनात आणि बदलत्या जीवनशैलीमध्ये आपले आरोग्य चांगले राहण्यासाठी नियमित व्यायामाची आवश्यकता असते. हे लक्षात घेऊन सागरी किनारा रस्त्यालगत स्वतंत्र 'जॉगिंग ट्रॅक' व 'सायकल ट्रॅक' उभारण्याचे प्रस्तावित करण्यात येत आहे. या दोन्ही ट्रॅकची लांबी प्रत्येकी ६.२० किमी एवढी प्रस्तावित करण्यात आली आहे
सागरी पदपथ
नेताजी सुभाष मार्ग (मरीन ड्राईव्ह) व खान अब्दुल गफार खान मार्ग (वरळी सी-फेस) या दोन्ही ठिकाणी बृहन्मुंबई महापालिकेद्वारे बसण्याची सुविधा असणा-या कट्ट्यांसह सागरी पदपथ तयार करण्यात आले आहेत. याच धर्तीवर सागरी किनारा रस्त्याच्या निमित्ताने मुंबईतील सर्वात मोठा सागरी पदपथ विकसित करण्यात येणार आहेत. याठिकाणी सुशोभिकरणाच्या अनुषंगाने देशी झाडे लावण्यात येणार आहेत. तसेच नागरिकांना बसण्यासाठी कट्ट्यांचे बांधकामही करण्यात येणार आहे.
उद्याने व खेळांची मैदाने
'देशातील महापालिकांमध्ये सर्वाधिक उद्यानांची चांगली देखभाल करणारी एक महापालिका' असा लौकिक असणा-या बृहन्मुंबई महापालिकेची बृहन्मुंबई महापालिका क्षेत्रात साधारणपणे ७५० उद्याने व ३१८ खेळांची मैदाने आहेत. सागरी किनारा रस्त्याच्या निमित्ताने उपलब्ध होणा-या भराव क्षेत्रातही महापालिकेद्वारे उद्याने व मैदाने विकसित करण्यात येणार आहेत. यामध्ये लहानमुलांसाठी घसरगुंडी, सी-सॉ फळी, झोके यासारख्या बाबीही असणार आहेत. तसेच यापैकी काही उद्याने वा मैदाने ही भूमिगत सुविधांच्या छतावरच  उभारण्यात येणार आहेत.
बसथांबे व भूमिगत पदपथ
सागरी किनारा रस्त्यालगत १४ ठिकाणी बसथांबे उभारण्यात येणार आहेत. त्याचबरोबर या बस थांब्यापर्यंत प्रवाश्यांना सहजपणे पोहचता यावे, यासाठी सागरी किनारा मार्गाखाली 'भूमिगत पदपथ' देखील तयार करण्यात येणार आहेत. या भूमिगत पदपथांमुळे सागरी किनारा रस्ता अधिक सहजपणे ओलांडणे शक्य होणार आहे.
प्रसाधन गृह
सागरी किनारा रस्त्यालगत नागरिकांच्या सुविधेसाठी प्रसाधनगृहे बांधण्यात येणार आहे. पुरेशा प्रमाणात व ठराविक अंतरानंतर रस्त्याच्या दोन्ही बाजूंना ही अद्यावत प्रसाधन गृहे बांधण्यात येणार आहेत. दिव्यांग व्यक्तींसाठी विशेष सुविधा देखील या प्रसाधन गृहांमध्ये असणार आहेत.
खुले नाट्यगृह
नागरिकांच्या कलागुणांना वाव मिळावा, यासाठी बृहन्मुंबई महापालिका क्षेत्रात महापालिकेची अनेक नाट्यगृहे व खुली नाट्यगृहे आहेत. प्रस्तावित सागरी किनारा रस्त्यालगत देखील महापालिकेद्वारे एक खुले नाट्यगृह उभारण्यात येणार आहे.1

mumbaivarta

{google-plus#https://plus.google.com/u/0/}

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget